దిల్లీ వెళ్లిన అమరావతి మహిళా ఐకాస నేతలు

గన్నవరం: అమరావతి మహిళా ఐకాస నేతలు దిల్లీ బయల్దేరి వెళ్లారు. రాజధాని మారకుండా చూడాలంటూ అన్ని పార్టీల పెద్దలకు విన్నవించేందుకు గన్నవరం విమానాశ్రయం నుంచి పయనమయ్యారు. రాజధాని రైతుల కష్టాలను నేతలకు తెలియజేస్తామని ఈ సందర్భంగా మహిళా ఐకాస నేతలు స్పష్టం చేశారు. అమరావతి ఒక ప్రాంతానికి చెందినది కాదని.. ఐదుకోట్ల ప్రజల సమస్య అనే విషయాన్ని నేతలకు వివరిస్తామన్నారు. ఈ అంశంపై ఆయా పార్టీల నేతలకు వినతిపత్రాలు అందజేస్తామని మహిళలు తెలిపారు. అమరావతిపై వైకాపా ఎంపీలు విషం చిమ్ముతున్నారని ఆవేదన వ్యక్తం చేశారు. దిల్లీ వెళ్లేముందు జై అమరావతి, ఒకే రాష్ట్రం..ఒకే రాజధాని అంటూ మహిళా ఐకాస నేతలు నినాదాలు చేశారు.