వరద బాధితులకు రూ.5వేలు ఇవ్వాలి: భాజపా

ఏలూరు: గత కొన్ని రోజులుగా కురుస్తున్న వర్షాలు, ఎగువ నుంచి వస్తున్న వరద కారణంగా గోదావరి నది ఉద్ధృతంగా ప్రవహిస్తోంది. దీంతో గోదావరి జిల్లాల్లోని పలు గ్రామాలు ముంపునకు గురయ్యాయి. పోలవరం ముంపు గ్రామాల్లో భాజపా రాష్ట్ర అధ్యక్షుడు సోము వీర్రాజు మంగళవారం పర్యటించారు. ముఖ్య నాయకులతో కలిసి అక్కడికి చేరుకున్న వీర్రాజు.. బలహీనంగా ఉన్న రింగ్‌ బండ్‌ గట్టు, కడెమ్మ స్లూయిజ్‌ ‌వద్ద గట్టుని పరిశీలించారు. అనంతరం వరదల కారణంగా పోలవరం సమీపంలో ముంపునకు గురైన వరి పొలాలను పరిశీలించి బాధితుల నుంచి నష్టం వివరాలు తెలుసుకున్నారు. బాధితులకు రూ.5వేల చొప్పున నష్ట పరిహారం ఇవ్వాలని ఈ సందర్భంగా రాష్ట్ర ప్రభుత్వాన్ని సోము వీర్రాజు డిమాండ్‌ చేశారు.