రాయపాటి నివాసంలో ముగిసిన సీబీఐ సోదాలు

గుంటూరు: మాజీ ఎంపీ రాయపాటి సాంబశివరావు నివాసంలో సీబీఐ సోదాలు ముగిశాయి. ట్రాన్స్‌ట్రాయ్‌ సంస్థ రుణం ఎగవేత వ్యవహారంలో కెనరా బ్యాంక్‌ ఫిర్యాదు మేరకు సీబీఐ అధికారులు కేసు నమోదు చేశారు. ఈ కేసు విచారణలో భాగంగా బెంగళూరు నుంచి వచ్చిన సీబీఐ బృందం గుంటూరులో తనిఖీలు చేపట్టింది. గుంటూరు, హైదరాబాద్‌లోని రాయపాటి నివాసాల్లో సోదాలు జరిగాయి. ట్రాన్స్‌ట్రాయ్‌ సంస్థకు చెందిన డ్యాక్యుమెంట్లను అధికారులు పరిశీలించారు. రాయపాటి వాంగ్మూలం నమోదు చేసుకున్న అనంతరం బ్యాంకు నోటీసులు, పలు పత్రాలను తమ వెంట తీసుకెళ్లారు. ట్రాన్స్‌ట్రాయ్‌తో రాయపాటికి ఉన్న సంబంధంపై సీబీఐ అధికారులు ఆరా తీశారు. కెనరా బ్యాంకు, ట్రాన్స్‌ట్రాయ్‌ మధ్య ఉన్న రుణ వ్యవహారంపైనే విచారణ జరిగినట్లు రాయపాటి కుటుంబసభ్యులు తెలిపారు. సుమారు ఏడు గంటల పాటు ఈ సోదాలు కొనసాగాయి.