త్వరలో రైతుల ఖాతాల్లోకి ‘రైతుబంధు’

హైదరాబాద్‌: తెలంగాణ రైతులకు శుభవార్త. త్వరలోనే రెండో విడత రైతుబంధు సహాయం అందివ్వాలని సీఎం కేసీఆర్‌ నిర్ణయించారు. ప్రగతిభవన్‌లో వ్యవసాయశాఖ మంత్రి నిరంజన్‌రెడ్డి, సీఎస్‌ సోమేశ్‌కుమార్‌, ఇతర ఉన్నతాధికారులతో సీఎం సమీక్ష నిర్వహించారు. యాసంగి పెట్టుబడి కోసం రైతుబంధు సహాయం ఎప్పటి నుంచి ఇవ్వాలనే దానిపై అధికారులతో ఆయన చర్చించారు. ఉన్నతాధికారులతో చర్చించిన అనంతరం ఈనెల 27 నుంచి జనవరి 7 వరకు రైతుబంధు నగదు రైతుల ఖాతాల్లో జమచేయాలని కేసీఆర్‌ సూచించారు. దీనికోసం రూ.7,300కోట్ల నిధులను వెంటనే విడుదల చేయాలని ఆర్థికశాఖను సీఎం ఆదేశించారు. తొలుత విస్తీర్ణం తక్కువగా ఉన్న రైతులకు రైతుబంధు అందించాలని..క్రమంగా ఎక్కువ విస్తీర్ణం ఉన్న రైతులకు ఇవ్వాలని స్పష్టం చేశారు.