ఎంసెట్‌ కౌన్సెలింగ్‌ షెడ్యూల్‌లో మార్పులు

వెల్లడించిన ప్రవేశాల కన్వీనర్ నవీన్ మిత్తల్ 

హైదరాబాద్: తెలంగాణ ఎంసెట్‌ కౌన్సెలింగ్‌ షెడ్యూల్‌లో మార్పులు చోటుచేసుకున్నాయి. ముఖ్యంగా రేపు జరగాల్సిన వెబ్‌ ఆప్షన్ల నమోదు ప్రక్రియను అధికారులు వాయిదా వేశారు. ఇంజినీరింగ్‌లో కొత్త కోర్సులు, కళాశాలల అనుబంధ గుర్తింపు ప్రక్రియ కొలిక్కి రాకపోవడంతో కౌన్సెలింగ్ షెడ్యూల్‌లో మార్పులు చేసినట్లు ప్రవేశాల కన్వీనర్, సాంకేతిక విద్యాశాఖ కమిషనర్ నవీన్ మిత్తల్ తెలిపారు. రేపటి నుంచి ఈ నెల 20వ తేదీ వరకు జరగాల్సిన వెబ్ ఆప్షన్ల నమోదు ప్రక్రియను నాలుగు రోజులకు కుదించి ఈ నెల 18 నుంచి 22వ తేదీల మధ్య చేపట్టాలని నిర్ణయించినట్లు చెప్పారు. ఇంజినీరింగ్ మొదటి విడత సీట్లను ఈ నెల 22వ తేదీన కేటాయించాలని గతంలో నిర్ణయించినప్పటికీ తాజా మార్పుల నేపథ్యంలో ఈ నెల 24న కేటాయించనున్నట్లు వివరించారు.

రేపటినుంచి మొదలు కానున్న ధ్రువపత్రాల పరిశీలన మాత్రం యథాతథంగా ఈ నెల 20వ తేదీ వరకు కొనసాగునున్నట్లు స్పష్టం చేశారు. ఈ క్రమంలో రేపటి నుంచి రాష్ట్ర వ్యాప్తంగా 36 సహాయ కేంద్రాల్లో ధ్రువపత్రాల పరిశీలన జరగనున్నట్లు చెప్పారు. ఇందుకోసం ఇప్పటి వరకు 35,824 మంది స్లాట్ బుక్ చేసుకున్నట్లు వివరించారు. రేపు రాష్ట్ర వ్యాప్తంగా సుమారు 9 వేల మంది ధ్రువపత్రాల పరిశీలనకు హాజరుకానున్నట్లు కమిషనర్‌ నవీన్‌ మిత్తల్‌ తెలిపారు.