అర్చకుడు లేకుండానే ఆ పూజ నిర్వహిస్తారట!

ఇంటర్నెట్‌ డెస్క్‌ : బిహార్‌, ఝార్ఖండ్‌ సహా పలు రాష్ట్రాల్లో విశేషమైన ఓ పూజను నిర్వహిస్తారు. అందులో భాగంగా సూర్య భగవానుడిని ప్రత్యేకంగా కొలుస్తారు. అసలు విషయం ఏమిటంటే ఈ పూజను అర్చకుడు లేకుండానే నిర్వహిస్తారట. 36 గంటల పాటు మంచినీళ్లు కూడా ముట్టుకోకుండా ఉపవాసం చేస్తారట. మరి ఈ అరుదైన పూజ సంగతులేంటో మనమూ తెలుసుకుందామా !
ఉత్తరాది రాష్ట్రాల్లో ఘనంగా నిర్వహించే ఈ పూజను ఛఠ్‌ అంటారు. సూర్యభగవానుడిని కొలిచే ఏకైక పూజ ఇదేనని అక్కడి వారి విశ్వాసం. దీనికే సూర్యశస్తిల్, దళాఛఠ్‌ అని కూడా పేర్లున్నాయాయి. ఏటా కార్తిక మాసం శుక్లపక్షంలోని షష్ఠి సందర్భంగా నాలుగు రోజుల పాటు ఈ ఛఠ్‌ పూజను నిర్వహిస్తారు. దీపావళి మాదిరిగానే ఈ పూజ సమయంలో దీపాలు వెలిగిస్తారు. నదీ ఘాట్‌ల వద్ద పండ్లతో అలంకరించి ఛఠ్‌మాతకు పూజలు చేస్తారు. అనంతరం పండ్లను పంచిపెడతారు. ఈ ఏడాది నవంబర్‌ 18న ప్రారంభమైన ఈ పూజ 21తో ముగియనుంది. ఆ రోజు ఉదయం సూర్యుడికి పూజలు చేసి వేడుకను ముగిస్తారు. పూజారి పాల్గొనని అత్యంత అరుదైన హిందూ పండుగగా ఛఠ్‌ పూజ ప్రాచుర్యం పొందింది. ఈ పూజలోని ప్రసాదాల్లో చెరకు ప్రధానంగా కనిపిస్తుంది. మహా పర్వ సందర్భంగా చెరకు గడలతో ఇల్లు మాదిరిగా నిర్మించి అందులో ఏనుగు ప్రతిమను ఉంచి పూజలు చేస్తారు.