ఈ ‘గజ’దొంగపై చర్యల్లేవు..

ఇంటర్నెట్‌ డెస్క్‌: పట్ట పగలు, నడి రోడ్డు మీదే బస్సును ఆపి చోరీ చేసిన ఓ ‘గజ’దొంగపై.. ఏ పోలీసులూ చర్య తీసుకోలేదు. ఎందుకంటే ఆ దొంగతనం చేసింది ఓ ఏనుగు కాబట్టి! కాగా, ఈ సంఘటనకు సంబంధించిన వీడియోను ఓ అటవీశాఖ అధికారి సామాజిక మాధ్యమాల్లో పంచుకున్నారు.

ఈ ఆసక్తికర వీడియో శ్రీలంకలోని కాటరంగమ ప్రాంతంలో చోటుచేసుకుంది. దీనిలో.. రోడ్డు మధ్యలో ఓ ఏనుగు నిలిచి ఉండటంతో బస్సు డ్రైవరు వాహనాన్ని స్లో చేశాడు. బస్సు తన పక్కకు వచ్చిన అనంతరం ఏనుగు తన తొండాన్ని కిటికీ లోంచి లోపలికి పెట్టి.. అక్కడ ఉన్న ఆహారాన్ని అందిపుచ్చుకునేందుకు ప్రయత్నించింది. ఈయత్నంలో ఆ ఏనుగు అక్కడ ఉన్న అరటిపళ్లను దొరికించుకుంది. ఆ విధంగా ఏనుగుకు ‘టోల్‌ టాక్స్‌’ చెల్లించిన డ్రైవరు బతుకు జీవుడా అంటూ బస్సును ముందుకు పోనిచ్చాడు.

ఇక ఈ సంఘటనకు బస్సులోని ప్రయాణికుల్లో కొందరు ఆశ్చర్యంతో షాక్‌ తినగా.. మరికొందరు గట్టిగా నవ్వడాన్ని మనం గమనించవచ్చు. కాగా, అడవి జంతువులకు ఆహార పదార్ధాలను తినిపించడం సరికాదని అటవీ అధికారులు హెచ్చరిస్తున్నారు. ఆ విధంగా చేస్తే ఆ జంతువులు అలవాటుపడి.. మనుషులు, వాహనాల సమీపానికి వచ్చేస్తూ ఉంటాయని.. అది వాటికీ, మనుషులకూ కూడా క్షేమం కాదని వారు అంటున్నారు. మరి ఈ గజదొంగను మీరూ చూసేయండి!