ఆర్మూర్‌లో రైతుల మహాధర్నా

ఆర్మూర్‌: నిజామాబాద్‌ జిల్లా ఆర్మూర్‌లో రైతులు మహాధర్నా నిర్వహించారు. సన్నరకం ధాన్యానికి రూ. 2,500, పసుపు పంటకు మద్దతు ధర కల్పించాలని కాంగ్రెస్‌ పార్టీ ఆధ్వర్యంలో ఆర్మూర్‌లోని మామిడిపల్లి చౌరస్తాలో ఆందోళన చేపట్టారు. జిల్లా వ్యాప్తంగా ఉన్నటువంటి రైతులు ఈ ధర్నాకు తరలివచ్చారు. సన్నాలకు మద్ధతు ధర కల్పించాలని డిమాండ్‌ చేశారు. మద్దతు ధర కల్పించే విషయంలో గత కొన్ని రోజులుగా ప్రభుత్వానికి అనేక సార్లు విజ్ఞప్తి చేసినా పట్టించుకోవడం లేదని ఆవేదన వ్యక్తం చేశారు. సన్న రకం వరి పంటను సాగు చేయమని ప్రభుత్వమే సూచించిందన్నారు. పంటకు తెగుళ్లు రావడంతో సరైన దిగుబడి రాలేదని.. ఇలాంటి తరుణంలో మద్దతు ధరతో పాటు బోనస్‌ కలిపి ఇవ్వాలని డిమాండ్ చేశారు. అలాగే పసుపుకు మద్దతు ధర కల్పించే విషయంలో కూడా ప్రభుత్వం స్పష్టత ఇవ్వాలని రైతులు డిమాండ్ చేశారు.