కమ్యూనిటీ హాళ్లలో వసతి: లోకేశ్‌ కుమార్‌

హైదరాబాద్‌: ఎడతెరపి లేకుండా వర్షాలు కురుస్తున్నందుకు హైదరాబాద్‌ నగర ప్రజలు బయటకు రావొద్దని జీహెచ్‌ఎంసీ కమిషనర్‌ లోకేశ్‌ కుమార్‌ సూచించారు. వర్షాలు, వరద నీటితో అనేక ప్రాంతాల్లో రహదారులపై చెట్లు పడిపోయాయని తెలిపారు. పలు లోతట్టు ప్రాంతాలు వరద ముంపునకు గురయ్యాయని పేర్కొన్నారు. జీహెచ్‌ఎంసీ అధికారులు, సహాయ బృందాలతో వరద సహాయక చర్యలు చేపట్టామని వివరించారు. మరో రెండు రోజులు నగరంలో వర్షాలు కురుస్తాయని ఆయన వెల్లడించారు. ప్రజలు ఇళ్లలోనే ఉండాలని ఆయన సూచించారు. శిథిలావస్థకు చేరిన భవనాలు, కొండవాలు ప్రాంతాల ప్రజలు వెంటనే ఖాళీ చేసి సురక్షిత ప్రాంతాలకు చేరుకోవాలని విజ్ఞప్తి చేశారు. ఎలాంటి ఆసరా లేనివారికి కమ్యూనిటీ హాళ్లలో తాత్కాలిక వసతి ఏర్పాటు చేస్తామన్నారు.