దేశ భవిష్యత్‌ తరగతిగదుల్లోనే తయారవుతోంది

గవర్నర్‌ తమిళిసై

హైదరాబాద్‌: దేశ, వ్యక్తుల భవిష్యత్‌ తరగతి గదుల్లోనే తయారవుతోందని తెలంగాణ గవర్నర్‌ తమిళిసై అన్నారు. దేశాన్ని నడిపించే నాయకులను తీర్చిదిద్దే ఉపాధ్యాయులే జాతినిర్మాతలని కొనియాడారు. దేవుళ్ల లాంటి గురువుల వల్ల ఎంతోమంది గొప్ప నాయకులుగా ఎదిగారని అన్నారు. హైదరాబాద్‌లో నిర్వహించిన కార్యక్రమంలో తమిళిసై మాట్లాడుతూ..పేద విద్యార్థులు సైతం ఉపాధ్యాయుల మార్గనిర్దేశంలో అద్భుతాలు సృష్టించారన్నారు. ‘‘పౌష్టికాహారంతో కూడిన విద్య ఆరోగ్యకరమైన దేశాన్ని తీర్చిదిద్దుతోంది. దేశ విద్యావ్యవస్థను తీర్చిదిద్దే సత్తా నూతన విద్యావిధానానికి ఉంది. కొత్త విధానం దేశాన్ని సూపర్‌పవర్‌గా తీర్చిదిద్దగలదు’’ అని తమిళిసై తెలిపారు.