ఇది పాముల సయ్యాటా.. కయ్యాలాటా? 

వైరల్‌ వీడియోకు నెటిజన్ల భిన్నాభిప్రాయాలు

ఇంటర్నెట్‌డెస్క్‌: సహజంగా పాములంటే అందరికీ భయమే. అవి చిన్నవైనా పెద్దవైనా ప్రాణ భయంతో ఆమడ దూరం పారిపోతారు. కానీ అవే పాములు ఎక్కడైనా సయ్యాడుతుంటే లేదా కయ్యాలాడుతుంటే ఆసక్తిగా తిలకిస్తారు. అప్పుడప్పుడూ సామాజిక మాధ్యమాల్లో అలాంటి వీడియోలు కూడా మనం ఇదివరకు చూసి ఉంటాం. కానీ, శుక్రవారం ఒడిశాకు చెందిన సుశాంత నందా అనే ఓ ఇండియన్‌ ఫారెస్ట్‌ ఆఫీసర్‌ ట్వీట్‌ చేసిన ఓ వీడియో ఆసక్తితో పాటు ఆశ్చర్యం కలిగిస్తోంది. 

తొలుత మురికి నీటిలో పోటాపోటీగా ఆడిన సర్పాలు తర్వాత ఒక్కసారిగా పైకి లేచాయి. గట్టుపైకి చేరి ఒకదానితో మరొకటి తలదూశాయి. ప్రస్తుతం ఈ వీడియో వైరల్‌గా మారింది. ఆ వీడియో పోస్టు చేసిన అధికారి.. ఆ రెండు పాములు ఎలుకలు తినేవి అని చెప్పడంతో పాటు అవి ఆధిపత్య పోరు కోసం కొట్లాడుతున్నాయని చెప్పారు. అయితే, నెటిజన్లు భిన్నాభిప్రాయాలు వ్యక్తం చేస్తున్నారు. అవి సయ్యాటలాడుతున్నాయని కొందరు అంటుండగా, మరికొందరు కయ్యాలాడుతున్నాయని కామెంట్లు పెడుతున్నారు. మీరు కూడా ఒకసారి ఆ వీడియో చూసి ఆస్వాదించండి.