డబుల్‌ డెక్కర్‌ జ్ఞాపకాలలో...మంత్రి కేటీఆర్‌

ఇంటర్నెట్‌ డెస్క్‌ : డబుల్‌ డెక్కర్‌ బస్సుల గురించి మీకు తెలుసా! అప్పట్లో ..హైదరాబాద్‌ నగరంలో ఇవి అత్యంత ప్రాచుర్యం పొందాయి. కానీ కాల క్రమేణా కనిపించకుండా పోయాయి. తాజాగా.. మంత్రి కేటీఆర్‌ వీటి గురించి గుర్తుచేసుకున్నారు. ఆ డబుల్‌ డెక్కర్‌ బస్సులతో తనకు ఉన్న అనుభూతులను పంచుకున్నారు. అవకాశం ఉంటే అలాంటి బస్సులను తిరిగి ప్రారంభించాలన్నారు. ఈ మేరకు రవాణా శాఖ మంత్రిని కోరారు.

గతంలో 7Z‌ డబుల్‌ డెక్కర్‌ ఆర్టీసీ బస్సు ప్రయాణికులను అప్జల్‌ గంజ్‌ నుంచి జూపార్క్‌ వరకు తీసుకెళ్లేదని కేటీఆర్‌ పేర్కొన్నారు. బస్సులోంచి వారు నగర అందాలను వీక్షిస్తూ మైమరిచి పోయేవారని గుర్తుచేసుకున్నారు. గత స్మృతులను తలచుకుంటూ.. నాటి డబుల్‌ డెక్కర్‌ బస్సులకు సంబంధించిన ఫొటోనూ జతచేస్తూ ఓ వ్యక్తి కేటీఆర్‌కు ట్వీట్‌ చేశారు. దీనిపై ఆయన స్పందించారు‌. తనకు కూడా ఆ మధుర జ్ఞాపకాలు ఉన్నాయని.. అబిడ్స్‌లోని పాఠశాలలో చదివిన రోజులను గుర్తుచేసుకుంటూ రీట్వీట్‌ చేశారు. కేటీఆర్‌ ట్వీట్పై రవాణా శాఖ మంత్రి పువ్వాడ అజయ్‌ కుమార్‌ స్పందించారు. ఏమాత్రం అవకాశం ఉన్నా.. ప్రస్తుత హైదరాబాద్‌ రోడ్లపై మళ్లీ డబుల్‌ డెక్కర్‌ బస్సులను నడిపేలా ఆర్టీసీకి సూచిస్తానని వివరించారు.