గుడ్డులాంటిదే మనిషి తల.. కాపాడుకోవాలి మరి!

ఎల్బీనగర్‌ ట్రాఫిక్ పోలీసులు వినూత్న అవగాహన

మలక్‌పేట: ప్రభుత్వం, పోలీసులు ఎన్నిసార్లు చెప్పినా ఇప్పటికీ కొంత మంది ద్విచక్ర వాహనదారులు హెల్మెట్లు ధరించకుండా రోడ్లపైకి వస్తున్నారు. అలాంటి వారికి అవగాహన కల్పించేందుకు ఎల్బీనగర్‌ ట్రాఫిక్ పోలీసులు వినూత్న కార్యక్రమాన్ని చేపట్టారు. ఎల్బీనగర్‌ ట్రాఫిక్‌ అదనపు సర్కిల్‌ ఇన్‌స్పెక్టర్‌ నాగమల్లు హెల్మెట్‌ లేకుండా రహదారిపైకి వచ్చిన ద్విచక్రవాహనదారులకు ఒక్కొక్కరికి ఒక్కో కోడిగుడ్డు చేతిలో పెట్టారు. ఈ కోడిగుడ్డు లాంటిదే మనిషి తల అని.. ఒకసారి ప్రమాదానికి గురైతే ప్రాణాలు పోవడమే కానీ తిరిగి మామూలుగా అవడమంటూ ఉండదని చెబుతూ అవగాహన కల్పించారు.

అనంతరం ఆయన మాట్లాడుతూ.. ‘‘ద్విచక్రవాహన ప్రమాదాల్లో అత్యధిక శాతం తలకు గాయాలై ప్రాణాలు కోల్పోతున్నారు. హెల్మెట్ ధరించకుండా ద్విచక్రవాహనం నడపడం వల్లే ఇలాంటి ప్రమాదాలు జరుగుతున్నాయి. కోడి గుడ్డులాగే మన తల కూడా చాలా సున్నితమైనది. ఎన్నిసార్లు చెప్పినా కొంత మంది ద్విచక్ర వాహనదారులు జాగ్రత్తలు పాటించకపోవడం వల్లే ఇలాంటి ప్రమాదాలు చోటుచేసుకుంటున్నాయి. ఎంతో మంది వారి ఆప్తులను కోల్పోతున్నారు. బయటకు వచ్చాక ఇంటి దగ్గర మన కోసం ఓ కుటుంబం ఉందనే విషయాన్ని ప్రతి ఒక్కరూ గుర్తుంచుకోవాలి’’ అని తెలిపారు.