ఎల్‌ఆర్‌ఎస్‌ దరఖాస్తు గడువు పొడిగింపు

హైదరాబాద్‌: రాష్ట్రంలో అనధికార ఫ్లాట్లు, అక్రమ లేఅవుట్ల క్రమబద్ధీకరణ(ఎల్‌ఆర్‌ఎస్‌) దరఖాస్తు గడువును తెలంగాణ ప్రభుత్వం పొడిగించింది. ఈ నెలాఖరు వరకు దరఖాస్తు చేసుకునేందుకు ప్రభుత్వం అవకాశం ఇచ్చింది. ఇప్పటివరకు ఎల్‌ఆర్‌ఎస్‌కు 19.33లక్షల దరఖాస్తులు వచ్చినట్టు ప్రభుత్వం వెల్లడించింది. 
ఎల్‌ఆర్‌ఎస్‌కు దరఖాస్తు దారుల నుంచి  భారీ స్పందన వస్తోంది. దీంతో రోజురోజుకీ దరఖాస్తుల సంఖ్య ఎక్కువ అవుతోంది. ఈ నెల 15 దరఖాస్తు గడువు ముగింపు కావడంతో సర్వర్‌పై ఒత్తిడి పెరిగింది. గత రెండు రోజులుగా దరఖాస్తు చేయడానికి ప్రయత్నిస్తున్న వారిని సాంకేతిక సమస్యలు చుట్టుముట్టాయి. ఈ క్రమంలో మరింత మంది దరఖాస్తు చేసుకునేందుకు అవకాశం కల్పించే దిశగా పురపాలక అధికారులు ప్రభుత్వానికి ప్రతిపాదనలు పంపారు. ప్రభుత్వం సానుకూలంగా స్పందించి ఈ నెలాఖరు వరకు దరఖాస్తు గడువును పెంచుతూ ఆదేశాలు జారీ చేసింది.