ఇంద్రకీలాద్రిపై విరిగిపడిన కొండచరియలు

విజయవాడ: ఇంద్రకీలాద్రిపై దుర్గగుడి సమీపంలో కొండచరియలు విరిగిపడ్డాయి. ఈ ఘటనలో ముగ్గురికి గాయాలయ్యాయి. క్షతగాత్రులను సమీపంలోని ఆస్పత్రికి తరలించి చికిత్స అందిస్తున్నారు. శిథిలాల కింద ఎవరైనా చిక్కుకున్నారా?లేదా? అనే విషయంపై ఇంకా స్పష్టత రావాల్సి ఉంది. కొండ చరియలు విరిగిపడటంతో ఓ రేకుల షెడ్డు పూర్తిగా ధ్వంసమైంది. ప్రస్తుతం సహాయకచర్యలు కొనసాగుతున్నాయి. శిథిలాల కింద ఎవరైనా చిక్కుకుపోయారా? అనే కోణంలో శిథిలాలను వేగంగా తొలగిస్తున్నారు. కొండచరియలు విరిగిపడిన నేపథ్యంలో ఇప్పటికే దర్శనాలు నిలిపివేశారు. దసరా ఉత్సవాలను పురస్కరించుకుని దుర్గమ్మకు పట్టువస్త్రాలు సమర్పించేందుకు కాసేపట్లో సీఎం జగన్ ఇంద్రకీలాద్రికి‌ రానున్నారు. సీఎం పర్యటన నేపథ్యంలో ఆ ప్రదేశంలో రాకపోకలు నిలిపివేయడంతో పెనుప్రమాదం తప్పింది.