వైకాపా ఎంపీకి కరోనా పాజిటివ్‌

కడప: వైకాపా ఎంపీ వైఎస్‌ అవినాష్‌రెడ్డికి కరోనా పాజిటివ్‌ నిర్ధారణ అయింది. వైఎస్‌ రాజశేఖర్‌రెడ్డి వర్ధంతిని కార్యక్రమాల సందర్భంగా కడప జిల్లాలో వచ్చేనెల 1, 2 తేదీల్లో సీఎం జగన్‌ పర్యటించనున్నారు. ఈ నేపథ్యంలో ప్రజాప్రతినిధులు, మీడియా ప్రతినిధులకు పరీక్షలు చేయగా ఎంపీ అవినాష్‌ రెడ్డికి కరోనా వైరస్‌ సోకినట్లు తేలింది. తనకు కరోనా నిర్ధారణ కావడంతో ఎంపీ వెంటనే హోం ఐసోలేషన్‌లోకి వెళ్లిపోయారు. అయితే కొద్దిరోజులగా వివిధ కార్యక్రమాలకు ఆయన హాజరైన అనుచరుల్లో ఆందోళన నెలకొంది. ఇప్పటికే రాష్ట్రంలో పలువురు ప్రజాప్రతినిధులకు కరోనా సోకింది. వీరిలో అధికార వైకాపాతో పాటు తెదేపా నేతలు కూడా ఉన్నారు.