ఆకాశంలోంచి ఊడిపడ్డ అదృష్టం!

ఇంటర్నెట్ డెస్క్: అదృష్టం ఉన్నప్పుడు తంతే బూరెల బుట్టలో పడతారు అని అంటారు. ఇండోనేషియాకు చెందిన జోసువా హుతాగలంగ్‌ అనే 33 ఏళ్ల వ్యక్తి జీవితంలో కూడా అదే జరిగింది. సుమత్రాలో నివసించే ఈయన  వృత్తి రీత్యా శవపేటికలు తయారు చేస్తుంటాడు. జోసువా ఓ రోజు ఆరు బయట పనిచేసుకుంటుండగా.. ఆయన రేకు ఇంటి పైకప్పుపై ఏదో భారీ వస్తువు పడిన శబ్దం వినిపించింది. ఏమిటా అని వెతికిన జోసువా తన ఇంటి పైకప్పు విరిగిపోయి ఉండటం గమనించాడు. దానిని సరిచేసేందుకు ప్రయత్నిస్తుండగా.. ఇంకా వేడిగా ఉన్న ఓ రాయి కనిపించింది.

ఆ వ్యక్తి దాని చిత్రాలను సామాజిక మాధ్యమాల్లో ఉంచాడు. అది 450 కోట్ల సంవత్సరాల వయసున్న అత్యంత అరుదైన కార్బోనాసియస్‌ క్రోండైట్‌ అనే అంతరిక్ష శిల అని పలువురు అంచనా వేస్తున్నారు.  దీని విలువ గ్రాముకు సుమారు రూ. 63 వేలు అని తెలిసింది. తనకు దొరికిన రాయి బరువు 2.1 కేజీలు కావటంతో జోసువాకు ఒకే దెబ్బతో కోట్లకు అధిపతై కూర్చున్నాడు!