తొలిసారిగి ఇక్కడ కరోనా కేసులు నమోదు

మజురో: కరోనా మహమ్మారి ప్రపంచ దేశాలను చుట్టేసింది. దాదాపు అన్ని దేశాలు ఈ వైరస్‌ బారిన పడి ఇప్పుడిప్పుడే కోలుకుంటున్నాయి. ప్రాన్స్‌ వంటి కొన్ని దేశాల్లో దీని ఉద్ధృతి తిరిగి ప్రారంభం అవుతోంది. మాస్కులు ధరించడం, భౌతిక దూరం, శానిటైజర్లు వాడకం వైరస్‌ను కట్టడి చేస్తున్నా.. టీకా వచ్చే వరకూ అజాగ్రత్త వహిస్తే ప్రమాదం పొంచి ఉన్నట్లే అని వైద్య నిపుణులు చెబుతున్నారు. ఈ క్రమంలో ఇప్పటికీ కొన్ని చిన్న దేశాలు, దీవులు కొవిడ్‌ వైరస్‌ దూరంగా ఉన్నాయి. అలాంటి వాటిలో సమోవా, టోంగా, నౌరు, మార్షల్‌ దీవులు కొవిడ్‌ నిబంధనలు పాటిస్తూ వైరస్‌ను దరిచేరనివ్వలేదు.  

మార్షల్‌ దీవుల్లో తాజాగా రెండు కరోనా కేసులు నమోదయ్యాయి. కొవిడ్‌ మహమ్మారి దాడి ప్రారంభమైన నాటి నుంచి ఇప్పటివరకూ కరోనా రహితంగా ఉన్న ఈ దీవుల్లో తాజా కేసుల నమోదవటం గమనార్హం. ఈ దీవుల్లోని ఖ్వజాలిన్‌ అటోల్‌ ప్రాంతంలోని యూఎస్‌ మిలటరీ బేస్‌లో ఇద్దరికి కరోనా పాజిటివ్‌గా తేలింది. వీళ్లిద్దరూ ఒకే విమానంలో ఈ ప్రాంతానికి చేరుకున్నట్లు అక్కడి అధికారులు నిర్ధరించారు. అక్టోబరు 27న ఈ ఇద్దరు వ్యక్తులు యూఎస్‌ఏలోని హవాయి ప్రాంతం నుంచి వచ్చినట్లు గుర్తించారు. వీళ్ల ద్వారా ఇతరులకు కరోనా వ్యాప్తి చెందలేదని వివరించిన అధికారులు కరోనా కట్టడికి కొత్త నిబంధనలేమీ అమలు చేయడం లేదని పేర్కొన్నారు.