భవిష్యత్‌లో మళ్లీ ఇలా జరగదు: తలసాని

హైదరాబాద్‌: ఉస్మానియా ఆస్పత్రిపై ప్రతిపక్షాలు బాధ్యతాయుతంగా మాట్లాడాలని మంత్రి తలసాని శ్రీనివాస్‌ యాదవ్‌ అన్నారు. భవిష్యత్‌లో ఇలాంటి ఘటనలు పునరావృతం కాకుండా చూస్తామని చెప్పారు. ఉస్మానియా ఘటనను హైకోర్టు సుమోటోగా తీసుకొని మార్గం చూపించాలన్నారు. ఉస్మానియా ఆస్పత్రిని నిర్మిద్దామంటే గతంలో ప్రతిపక్షాలు అడ్డుకున్నాయని విమర్శించారు. అప్పుడు ఉస్మానియా, ఇప్పుడు సచివాలయానికి అడ్డుపడుతున్నారని మండిపడ్డారు. భాజపా నేతలది హైదరాబాద్‌లో ఒక డ్రామా..దిల్లీలో మరో డ్రామా అని ఎద్దేవా చేశారు. ప్రతిపక్షాలు హైకోర్టుకు వెళ్లడం వల్లే గతంలో ఉస్మానియా భవనాల నిర్మాణం ఆగిపోయిందని వ్యాఖ్యానించారు. ప్రభుత్వ నియంత్రణలోనే ప్రైవేటు ఆస్పత్రులు ఉంటాయని చెప్పారు.