మొబైల్‌ యాప్‌ ద్వారా వార్షిక పరీక్షలు!

నాగ్‌పూర్‌ యూనివర్సిటీ ఏర్పాట్లు

నాగ్‌పూర్‌: దేశవ్యాప్తంగా కరోనా వైరస్‌ మహమ్మారి విజృంభిస్తోన్న తరుణంలో విద్యాసంస్థలకు పరీక్షల నిర్వహణ సవాలుగా మారింది. వీటిని నిర్వహించేందుకు ఇప్పటికే కొన్ని యూనివర్సిటీలు ఓపెన్‌ బుక్‌ టెస్ట్‌ విధానాన్ని అనుసరిస్తున్నాయి. తాజాగా నాగ్‌పూర్‌ యూనివర్సిటీ మరో ముందడుగు వేసింది. అక్టోబర్‌ 1 నుంచి జరిగే ఫైనల్‌ ఇయర్‌ పరీక్షలను మొబైల్‌ యాప్‌ ద్వారా నిర్వహిస్తున్నట్లు ప్రకటించింది. వీటికోసం ప్రత్యేకంగా మొబైల్‌ యాప్‌ను రూపొందించింది. ఈ పరీక్షలకు 78వేల మంది ఫైనల్‌ ఇయర్‌ విద్యార్థులు హాజరవుతారని యూనివర్సిటీ వెల్లడించింది.

అయితే, ఆన్‌లైన్‌ పరీక్షలో యాభై బహుళ ఎంపిక ప్రశ్నలను ఇస్తారు. వీటిలో విద్యార్థులు 25 ప్రశ్నలకు సమాధానాలు ఇవ్వాల్సి ఉంటుంది. యూనివర్సిటీ పరీక్షల షెడ్యూల్‌ ప్రకారం అక్టోబర్‌ 1 నుంచి 18వరకు నిర్వహించనున్నారు. ఇందుకోసం వివిధ సబ్జెక్టులకు సంబంధించి లక్షా 82వేల ప్రశ్నలను రూపొందించినట్లు విశ్వవిద్యాలయ అధికారులు వెల్లడించారు. పరీక్షలకు ముందస్తుగా సిద్ధం అయ్యేందుకు కూడా విద్యార్థులు ఈ యాప్‌ను ఉపయోగించుకోవచ్చని తెలిపారు.