మేడపైన వరిసాగు..బాగు..బాగు..

ఇంటర్నెట్‌ డెస్క్‌ :  సాధారణంగా ఇంటి మీద కూరగాయలు, పూల మొక్కలు పెంచటం మీరు చూసే ఉంటారు. కానీ..వరి పంటను సాగు చేయటం ఎప్పుడైనా చూశారా? పోనీ ఎక్కడైనా విన్నారా? ...ఇంటిమీదా? వరి పంటా? అదేంటి? అని విడ్డూరంగా అనిపిస్తోంది కదా! కానీ..ఓ వ్యక్తి నిజంగానే మేడ మీద వరి పండిస్తున్నాడు. సేద్యంపై ఉన్న మక్కువతో ఇంటినే వ్యవసాయ క్షేత్రంగా మార్చాడు. వరి సాగుతో అందరినీ ఆశ్చర్య పరుస్తున్నాడు. అదికూడా పూర్తిగా సేంద్రీయ పద్ధతిలో. ఇంతకీ అతడెవరు? అ కథేంటీ? ఓ సారి చూసేద్దాం మరి... 

మహారాష్ట్ర, కోల్హపుర్‌ పరిధిలోని కజ్బా బావ్‌డాకు చెందిన సుధాకర్‌ పాటిల్‌ ఓ బ్యాంకులో ఉద్యోగి. ఆయనకు వ్యవసాయం చేయటమంటే ఎంతో ఇష్టం. లాక్‌డౌన్‌ సమయంలో వచ్చిన ఆలోచనతో ఇంటివద్దే వరిపంటను సాగుచేయాలని నిర్ణయించుకున్నాడు. టెర్రస్ పై ప్లాస్టిక్‌ డబ్బాలను ఉంచి అందులో వరి పంటను వేశాడు. దానితో పాటు పండ్లు, కూరగాయలు, పసుపు, తృణధాన్యాలు, మిరియాలు తదితరాలను సాగు చేశాడు. ఈ పంటలను పండించటంలో పూర్తిగా సేంద్రీయ పద్ధతులు పాటిస్తున్నట్లు ఆయన వివరించాడు. ఈ ధాన్యం కొన్నినెలల పాటు తన కుటుంబానికి సరిపోతుందని పేర్కొన్నాడు. భలే ఆలోచన కదూ...వ్యవసాయం మీద మక్కువ ఉంటే చాలు ఉన్న స్థలంలోనే పంటలు పండించొచ్చని నిరూపిస్తున్న పాటిల్‌ అందిరికీ స్పూర్తిగా నిలుస్తున్నాడు.