ఆకలి తీర్చలేక..‘అమ్మ’ ఓడిపోయింది

అనంతపురం: మహమ్మారి కరోనా బంధాలను దూరం చేస్తోంది. వైరస్‌ సోకిందని కన్న తల్లినే ఓ కొడుకు వదిలించుకోవడానికి ప్రయత్నించిన ఘటన మరువక ముందే.. బిడ్డ ఆకలి తీర్చలేక ఓ చిన్నారిని కన్న తల్లే అమ్మేసింది. ఈ దయనీయ ఘటన అనంతపురం జిల్లా బుచ్చర్లలో చోటు చేసుకుంది. వివరాల్లోకి వెళ్తే.. సునీతమ్మ 8 నెలల కిందట ఆడ శిశువుకు జన్మనిచ్చింది. లాక్‌డౌన్‌ కారణంగా మూడు నెలలుగా పనులు లేకపోడంతో కుటుంబమంతా పస్తులుండాల్సిన దుస్థితి ఏర్పడింది. దీంతో ఆ దంపతులు యాచకులకు చిన్నారిని అమ్మేశారు. గమనించిన గ్రామస్థులు వారి నుంచి శిశువును తీసుకొని తల్లిదండ్రులకు అప్పగించారు. ఘటనాస్థలికి చేరుకున్న సబ్‌కలెక్టర్‌ హరిప్రసాద్‌ బాధితులకు సాయమందించారు. వారిని ప్రభుత్వమే ఆదుకోవాలని గ్రామస్థులు కోరుతున్నారు.