పీహెచ్‌డీ చేసినా.. కూలిపనే దిక్కయింది!

కడప: కరోనా మహమ్మారి ప్రజల జీవితాలను అతలాకుతలం చేస్తోంది. దీంతో ఎంతో మంది ఉపాధి కోల్పోయి ఇబ్బందులు ఎదుర్కొంటున్నారు. ప్రైవేటు పాఠశాలలు, కళాశాలలు మూతపడటంతో ఉపాధ్యాయులు, అధ్యాపకుల పరిస్థితి దయనీయంగా మారింది. ఫలితంగా కొందరు దినసరి కూలీలుగా మారుతున్నారు. కడప జిల్లా కాజీపేట మండలం తవ్వారిపల్లెకు చెందిన తవ్వ వెంకటయ్య పీహెచ్‌డీ చేసి ప్రైవేటు కళాశాలలో తెలుగు ఉపాధ్యాయుడిగా పని చేస్తున్నారు. కథా రచయిత, పరిశోధకుడైన వెంకటయ్య వ్యాకరణ బోధిని, వ్యాసధార, యువతరం, సీమకథ, తొలకరి వంటి రచనలు చేశారు.

కరోనా ప్రభావంతో ఆయన ఉపాధి కోల్పోయారు. చదువుకునే సమయంలో చేసిన పని అనుభవంతో తిరిగి గృహనిర్మాణంలో బేల్‌దార్‌ వృత్తిని ఎన్నుకొని కుటుంబాన్ని నెట్టుకొస్తున్నారు. 2014 నవంబరులో యోగి వేమన యూనివర్సిటీ నుంచి ఆయన పీహెచ్‌డీ పొందారు. తరువాత ప్రైవేటు డిగ్రీ కళాశాలలో పని చేయడం ప్రారంభించారు. లాక్‌డౌన్ కారణంగా కళాశాల మూసివేశారు. తిరిగి ఎప్పుడు తెరుస్తారో తెలియని పరిస్థితుల్లో గృహనిర్మాణ కూలీగా మారి బేల్‌దార్‌ పని చేపట్టారు. కుటుంబ పోషణ కోసం కరోనా విపత్కర పరిస్థితుల్లో ఎవరైనా ప్రత్యామ్నాయ మార్గాలు వెతుక్కోవాల్సిందేనని ఆయన చెబుతున్నారు.