చుక్కనీరు తొణకకుండా.. సాఫీగా రైలుప్రయాణం!

బెంగళూరు: ట్రాక్‌ల సంరక్షణకు రైల్వే శాఖ ఎంతో కృషి చేస్తోందని కేంద్ర రైల్వే శాఖ మంత్రి పీయూష్‌ గోయెల్‌ తెలిపారు. ఈ మేరకు ఆయన ట్విటర్‌లో ఓ వీడియో పోస్ట్‌ చేస్తూ రైల్వే ట్రాక్‌ల నిర్వహణ తీరుకు అందులోని దృశ్యమే నిదర్శనమని తెలిపారు. ఆ వీడియోలో మైసూరు, బెంగళూరు మధ్య ట్రాక్‌పై రైలు వేగంగా ప్రయాణిస్తున్న దృశ్యం ఉంటుంది. ఆ రైళ్లో ఓ గాజు గ్లాసులో నిండుగా నీరు ఉన్నప్పటికీ.. ప్రయాణంలో చుక్క నీరు తొణకకుండా ఉన్న దృశ్యం అందరినీ ఆకట్టుకుంటుంది. ఆ వీడియోను పోస్ట్‌ చేస్తూ ఆయన ఈ విధంగా ట్వీట్ చేశారు. ‘కర్ణాటకలోని బెంగళూరు, మైసూరు మధ్య రైల్వే ట్రాక్‌ల నిర్వహణ తీరుకు ఫలితమిది. ప్రతిఒక్కరూ దీన్ని చూడండి. రైలు వేగంగా వెళ్తున్నప్పటికీ.. ఒక చుక్క నీరు కూడా తొణకకుండా ప్రయాణం సాఫీగా సాగుతోంది’అని గోయెల్‌ ట్వీట్‌లో పేర్కొన్నారు. కాగా ఈ వీడియో సామాజిక మాధ్యమాల్లో వైరల్‌గా మారింది. ఈ ట్రాక్‌ నిర్వహణ పనులు 130కిలోమీటర్ల మేర రూ.40కోట్లతో చేపట్టామని రైల్వే అధికారులు తెలిపారు.