యథేచ్ఛగా ఇసుక అక్రమ రవాణా

మణుగూరు: భద్రాద్రి కొత్తగూడెం జిల్లా మణుగూరు గోదావరి పరివాహక ప్రాంతంలో ఇసుక అక్రమ రవాణా యథేచ్ఛగా సాగుతోంది. స్థానిక గ్రామాల్లో ప్రజాప్రతినిధుల పూర్తి స్థాయి అండదండలతో మణుగూరు నుంచి హైదరాబాద్‌ వైపు నిత్యం ఇసుక రవాణా చేస్తున్నారు. ఉదయం వేళల్లో ర్యాంపుల నుంచి ఇసుకను తోడి రామానుజవరం, సాంబాయగూడెం, కొండాయిగూడెం, మల్లెపల్లి గ్రామాల్లో నిల్వ చేస్తున్నారు. అర్ధరాత్రి సమయంలో మణుగూరు నుంచి ఖమ్మం, అక్కడి నుంచి హైదరాబాద్‌కు ఇసుకను తరలిస్తున్నారు. దాదాపుగా 1000 లారీలకుపైగా ఇసుక డంప్‌లు గుట్టలుగా పేరుకుపోయాయి. చాలా కాలంగా రూ. కోట్ల ఇసుక అక్రమ దందా సాగుతున్నా అధికారులు తమకేమీ పట్టనట్లు వ్యవహరిస్తున్నారని స్థానికులు ఆరోపిస్తున్నారు.మరోవైపు ఇసుక అక్రమ రవాణాను అడ్డుకునేందుకు రామానుజవరం సర్పంచ్‌ సతీశ్‌ యత్నించారు. గతంలో ఆయనతో ఇసుక వ్యాపారులు బేరసారాలకు దిగారు. కానీ, ఆయన అంగీకరించకపోవడంతో బెదిరింపులకు దిగారు. ఇసుక అక్రమ రవాణాపై సర్పంచ్‌ సతీశ్‌ ఉన్నతాధికారులకు లేఖ రాశారు.