శ్రీశైలం 8 గేట్ల ద్వారా నీటి విడుదల

శ్రీశైలం: ఎగువ ప్రాంతాల్లో కురుస్తున్న వర్షాలకు శ్రీశైలం జలాశయానికి వరద నీరు పోటెత్తుతోంది. దీంతో అధికారులు జలాశయం ఎనిమిది గేట్లు ఎత్తి దిగువకు నీటిని విడుదల చేస్తున్నారు. ప్రస్తుతం జలాశయానికి 1,63,517 క్యూసెక్కుల వరద వస్తోంది. దీంతో శ్రీశైలం స్పిల్‌వే ద్వారా 1,96,203 క్యూసెక్కుల నీటిని దిగువకు విడుదల చేస్తున్నారు. ప్రస్తతం జలాశయంలో 884.9 అడుగుల నీటి మట్టం ఉన్నట్లు అధికారులు తెలిపారు. శ్రీశైలం జలాశయంలో ప్రస్తుతం 215.32 టీఎంసీల నీరు నిల్వ ఉంది. శ్రీశైలం కుడిగట్టు జలవిద్యుత్‌ కేంద్రంలో విద్యుదుత్పత్తి కొనసాగుతోంది. దీని ద్వారా అదనంగా మరో 30,749 క్యూసెక్కుల నీటిని విడుదల చేస్తున్నారు.