బంగారంతో మిఠాయిలు.. కిలోకు రూ.9వేలు..!

గాంధీనగర్‌: మిఠాయిల్లో నేతి, డ్రైఫ్రూట్స్‌ ఇలా రకరకాల పదార్థాలతో చేసిన వాటిని ఇదివరకు మనం చూసుంటాం. కానీ గుజరాత్‌లోని సూరత్‌కు చెందిన ఓ దుకాణదారుడు విభిన్నమైన రీతిలో స్వీట్స్‌ తయారు చేసి అందరి దృష్టిని ఆకర్షిస్తున్నాడు. ఆ రాష్ట్ర ప్రజలు ప్రత్యేకంగా భావించే ‘ఘారి’ అనే మిఠాయిని ఏకంగా బంగారంతో తయారు చేసి స్వీట్స్‌ ప్రియులను ఆశ్చర్యానికి గురిచేశాడు. మరి ఆ బంగారు ఘారి విశేషాలు, దాని ధర ఎంతో తెలుసుకుందాం. 

వివరాల్లోకి వెళ్తే.. గుజరాత్‌లో చండీ పడ్వా అనేది ఓ ముఖ్యమైన పండగ. శరద్‌పూర్ణిమ తర్వాత రోజున ఈ పండగను జరుపుకొంటారు. ప్రధానంగా ఈ పండగకు గుజరాత్‌ ప్రజలు ఘారి అనే స్వీట్‌ను తయారుచేసుకుని ఇష్టంగా తింటారు. ఈ క్రమంలో ఈ ఏడాది ఏదైనా ప్రత్యేకంగా తయారు చేయాలని భావించిన ఓ దుకాణ యజమాని బంగారంతో ఘారిని తయారుచేసి ఆశ్చర్యపరిచాడు. బంగారు ఘారి అంటే దాంట్లో అంతా బంగారం ఉంటుందని దానర్థం కాదు. స్వీట్‌ పైభాగంలో మాత్రం బంగారు తాపనం ఉంటుందని ఫొటోల ద్వారా మనకు అర్థమవుతుంది. ఈ సందర్భంగా దుకాణ యజమాని రోహన్‌ మాట్లాడుతూ.. ‘ఈ ఏడాది బంగారు ఘారిని తయారు చేశాం. ఇది ఆరోగ్యానికి మంచిది. ఆయుర్వేదంలోనూ బంగారాన్ని మంచి ప్రయోజనకర పదార్థంగా చెప్తారు. ప్రస్తుతం మార్కెట్లో ఈ స్వీట్‌కు మేం ఊహించిన దానికన్నా తక్కువే డిమాండ్‌ వచ్చింది. కానీ రాబోయే రోజుల్లో మంచి స్పందన వస్తుందని అనుకుంటున్నాం. ఈ గోల్డ్‌ ఘారీ ధర కిలోకు రూ.9వేలు. సాధారణ ఘారీ మిఠాయి అయితే కిలోకు రూ.660 నుంచి రూ.820 ధర ఉంటుంది’అని చెప్పారు. ప్రస్తుతం ఈ స్వీట్స్‌కు సంబంధించిన చిత్రాలు సామాజిక మాధ్యమాల్లో వైరల్‌గా మారాయి.