పారదర్శకంగా జీహెచ్‌ఎంసీ ఎన్నికలు: ఎస్‌ఈసీ

హైదరాబాద్‌: జీహెచ్‌ఎంసీ ఎన్నికల నిర్వహణకు అవసరమైన రిటర్నింగ్‌, సహాయ రిటర్నింగ్‌ అధికారుల నియామకం పూర్తయిందని రాష్ట్ర ఎన్నికల కమిషనర్ ‌(ఎస్‌ఈసీ) పార్థసారథి తెలిపారు. ప్రస్తుత పాలకమండలి గడువు ఫిబ్రవరి 10తో ముగుస్తుందని.. ఈలోపు ఎన్నికలు నిర్వహించాల్సిన బాధ్యత రాష్ట్ర ఎన్నికల సంఘంపై ఉందని చెప్పారు. ఎన్నికల నోటిఫికేషన్‌ విడుదల చేసినప్పటి నుంచి ప్రవర్తనా నియమావళి అమల్లోకి వస్తుందన్నారు. దీనిని అన్ని రాజకీయ పార్టీలు, అభ్యర్థులు తప్పక పాటించాలని ఎస్‌ఈసీ సూచించారు. నేతలు సంయమనం పాటిస్తూ వ్యక్తిగత దూషణలకు దిగకుండా రాష్ట్ర ఎన్నికల సంఘానికి సహకరించాలన్నారు. 

పోటీ చేసే అభ్యర్థులు జీహెచ్‌ఎంసీలో ఓటరుగా నమోదై ఉండాలని.. 2016 ఎన్నికల్లో నిర్ణయించిన వార్డుల రిజర్వేషన్లే కొనసాగుతాయని పార్థసారథి స్పష్టం చేశారు. అన్ని అభ్యంతరాలు, సలహాలు స్వీకరించి ఎటువంటి అవకతవకలకు ఆస్కారం లేకుండా పారదర్శకంగా ఎన్నికలు నిర్వహిస్తామన్నారు. సీనియర్ అధికారులను ఎన్నికల పరిశీలకులుగా నియమిస్తామన్నారు. వార్డులో నివసించే ఓటర్లందర్నీ ఆ వార్డులోనే చేర్చాలని.. ఒక వార్డు ఓటరు ఇంకో వార్డులో ఉండరాదని చెప్పారు. ఒక కుటుంబంలోని ఓటర్లంతా ఒకే వార్డులో ఉండేలా కచ్చితంగా నిర్ధారించుకోవాన్నారు. దీనిపై జీహెచ్ఎంసీ కమిషనర్, డిప్యూటీ మున్సిపల్ కమిషనర్లను ఆదేశిస్తామని ఎస్‌ఈసీ స్పష్టం చేశారు.