గజవాహనంపై దర్శనమిచ్చిన శ్రీవారు

తిరుమల: శ్రీవారి సాలకట్ల బ్రహ్మోత్సవాలు వైభవంగా సాగుతున్నాయి. బ్రహ్మోత్సవాల్లో భాగంగా ఆరో రోజు రాత్రి గజవాహనంపై శ్రీనివాసుడు దర్శనమిచ్చారు. కొవిడ్‌ నేపథ్యంలో ఉత్సవాలను ఆలయానికే పరిమితం చేశారు. ఆలయంలోని కల్యాణ మండపంలో గజవాహనంపై సర్వాంతర్యామిని అర్చకులు కొలువుదీర్చారు.

ఈరోజు ఉదయం హనుమంత వాహనంపై దర్శనమివ్వగా.. సాయంత్రం సర్వభూపాల వాహనంపై, రాత్రికి గజవాహనంపై శ్రీహరి అభయ ప్రదానం చేశారు. బ్రహ్మోత్సవ వేళ అర్చకుల వేదమంత్రోచ్ఛరణలు, మేళతాళాలు, మంగళవాయిద్యాల నడుమ శ్రీనివాసుడుకి వాహనసేవలు నిర్వహిస్తున్నారు.