Cow Calfs in the Car: కారులో ఆవు దూడలు.. 

జీవాలపై ఎంత ప్రేమ ఉన్నప్పటికీ శునకం, పిల్లిని తప్ప ఇతర జంతువులను కారులో షికారుకు తీసుకెళ్లలేం. కానీ ఓ వ్యక్తి మాత్రం ఏకంగా మూడు ఆవు దూడలను కారులో తీసుకెళ్తున్న వీడియో సామాజిక మాధ్యమాల్లో వైరల్‌గా మారింది. అమెరికాలోని విస్కాన్సిన్‌లో నివసించే జెస్సికా నెల్సన్‌ అనే మహిళ కారులో వెళుతుండగా మెక్‌డొనాల్డ్స్‌ ఎదురుగా నిలిపి ఉంచిన కారులో ఓ ఆవు ఉండటాన్ని గమనించింది. దాన్ని వీడియో తీసి ఫేస్‌బుక్‌లో పోస్ట్‌ చేయగా అది వైరల్‌గా మారింది. మొదట కారులో ఆవును చూసి నమ్మలేకపోయనని నెల్సన్‌ తెలిపింది. ఈ వీడియోను చూసిన ఆవు యజమాని తనను సంప్రదించినట్లు ఆ మహిళ అసోసియేటెడ్‌ ప్రెస్‌కి తెలిపింది. బయటకు కనిపించింది చిన్న దూడేనని.. వెనుక సీట్లో మరో రెండు దూడలు పడుకుని ఉన్నాయని.. వీటిని అప్పుడే కొనుగోలు చేసి తీసుకెళ్తున్నట్లు ఆవు యజమాని వివరించారని తెలిపింది.