శ్రీశైలం నుంచి సాగర్‌కు కృష్ణమ్మ పరవళ్లు

10 గేట్లు ఎత్తి దిగువకు నీరు విడుదల

సున్నిపెంట సర్కిల్‌: శ్రీశైలం నుంచి నాగార్జునసాగర్‌ వైపు కృష్ణమ్మ ఉరకలు వేస్తోంది. భారీ వర్షాల కారణంగా ఎగువ పరీవాహక ప్రాంతాల నుంచి శ్రీశైలం జలాశయానికి 3,60,936 క్యూసెక్కుల నీటి ప్రవాహం వస్తోంది. వరద కొనసాగుతుండటంతో 10 గేట్లను 15 అడుగుల మేర పైకెత్తి స్పిల్‌వే ద్వారా 3,77,427 క్యూసెక్కుల నీటిని దిగువకు విడుదల చేస్తున్నారు. శ్రీశైలం జలాశయం పూర్తిస్థాయి నీటిమట్టం 885 అడుగులు కాగా.. ప్రస్తుతం 884.50 అడుగుల వరకు నీరు చేరింది. పూర్తిస్థాయి నీటి నిల్వ సామర్థ్యం 215.807 టీఎంసీలు కాగా  ప్రస్తుత నీటి నిల్వ 212.9198 టీఎంసీలుగా నమోదైంది. కుడిగట్టు జలవిద్యుత్‌ కేంద్రంలో విద్యుత్‌ ఉత్పత్తి చేస్తూ అదనంగా 26, 427 క్యూసెక్కుల నీటిని నాగార్జున సాగర్‌కు విడుదల చేస్తున్నారు.