ఈసారి మాడవీధుల్లోనే శ్రీవారి వాహనసేవలు

తిరుమల: శ్రీవారి నవరాత్రి బ్రహ్మోత్సవాలను ఈనెల 16 నుంచి 24 వరకు నిర్వహించనున్నారు. ఈ నేపథ్యంలో తితిదే అదనపు ఈవో ధర్మారెడ్డి బ్రహ్మోత్సవాల నిర్వహణపై సమీక్ష నిర్వహించారు. బ్రహ్మోత్సవాల్లో వాహన సేవలను మాడవీధుల్లో నిర్వహించాలని.. దర్శన టికెట్లు ఉన్నవారిని మాత్రమే గ్యాలరీల్లోకి అనుమతించాలని నిర్ణయించారు. ఉత్సవాలు జరిగే రోజుల్లో ఉదయం 8 నుంచి 10 గంటల వరకు.. రాత్రి 7 నుంచి 9 గంటల వరకు వాహన సేవలను నిర్వహించనున్నారు. ఆలయంలోని కల్యాణ వేదిక వద్ద పుష్పప్రదర్శన, ఎగ్జిబిషన్‌ ఏర్పాటు చేయాలని సమీక్షలో అధికారులు నిర్ణయించారు. 

ఇటీవల శ్రీవారి సాలకట్ల బ్రహ్మోత్సవాలు వైభవంగా జరిగాయి. కొవిడ్‌ పరిస్థితుల నేపథ్యంలో వాహన సేవలను కల్యాణ మండపానికే పరిమితం చేశారు. నవరాత్రి బ్రహ్మోత్సవాల్లో వాహనసేవలను మాడవీధుల్లో నిర్వహించాలని నిర్ణయించడంతో పరిమిత సంఖ్యలో భక్తులను గ్యాలరీల్లోకి అనుమతించనున్నారు.