వందేభారత్‌ ద్వారా 39 లక్షల మంది స్వదేశానికి..

దిల్లీ: ఈ ఏడాది మేలో వందేభారత్‌ మిషన్‌ ప్రారంభించినప్పటి నుంచి ఇప్పటి వరకు 39లక్షల మందిని సురక్షితంగా స్వదేశానికి రప్పించినట్లు కేంద్ర పౌరవిమానయాన శాఖ మంత్రి హర్‌దీప్‌సింగ్‌ పురి తెలిపారు. ఈ మేరకు ఆయన ట్విటర్‌లో ప్రకటించారు. కరోనా కారణంగా లాక్‌డౌన్‌ విధించడంతో విదేశాల్లో చిక్కుకున్న భారతీయులను స్వదేశానికి రప్పించేందుకు వందేభారత్‌మిషన్‌ను కేంద్రం ప్రారంభించింది. డిసెంబరు 18 శుక్రవారం నాడు 8,546 మంది భారత్‌కు వచ్చినట్లు మంత్రి ఆ ట్వీట్‌లో పేర్కొన్నారు. డిసెంబరు 1 నుంచి ఈ మిషన్‌ ఫేజ్‌-8 ప్రారంభించిందని విదేశాంగ శాఖ అధికార ప్రతినిధి అనురాగ్‌ శ్రీవాత్సవ తెలిపారు. దీనిలో భాగంగా లక్షాయాభైవేల మందిని స్వదేశానికి రప్పించనున్నట్లు వారు తెలిపారు. మే 25 నుంచి భారత్‌లో దేశీయ విమాన సర్వీసులను ప్రారంభించిన కేంద్రం అంతర్జాతీయ సర్వీసులపై నిషేధం పొడిగించింది. ఈ నెల 31వరకూ వాటిపై నిషేధం ఉంటుందని వారు తెలిపారు. కరోనా కారణంగా మార్చి 23 నుంచి అంతర్జాతీయ సర్వీసులను ప్రభుత్వం నిలిపేసింది.