చిన్నారిని కాపాడిన కలియుగ వసుదేవుడు!

ఇంటర్నెట్‌ డెస్క్‌ : హోరు వానలో వసుదేవుడు బాలకృష్ణుడిని తలపై పెట్టుకుని ఉప్పొంగుతున్న యమునా నదిని దాటించాడన్న కథ గురించి మీలో చాలామందికి తెలిసే ఉంటుంది కదూ! అచ్చం అలాంటిదే ఈ ఘటన. భారీ వర్షాలకు అతలాకుతలమైన బెంగుళూరులో శుక్రవారం ఈ సంఘటన జరిగింది. ఈ ఘటనలో పదిహేను రోజుల వయసున్న శిశువును సురక్షితంగా తల్లి చెంతకు చేర్చాడు ఓ యువకుడు. వివరాల్లోకి వెళ్తే.. శుక్రవారం బెంగళూరులో కుండపోత వర్షం కురిసింది. దాంతో శివార్లలోని ఇళ్లు నీట మునిగాయి. ఈ నేపథ్యంలో నీటిలో మునిగిన ఓ ఇంటి వద్ద నుంచి శిశువును తలపై పెట్టుకుని మరో ఇంటికి తీసుకెళ్లాడు ఆ యువకుడు. శిశువును సురక్షితంగా తల్లి చెంతకు చేర్చాడు ఈ కలియుగ వసుదేవుడు. ఈ ఘటనకు సంబంధించిన వీడియో ఇప్పుడు సామాజిక మాధ్యమాల్లో హల్‌చల్ చేస్తోంది. ఆ యువకుడు అదే రోజు మరొక చోట కూడా ఓ బాలికను కాపాడినట్లు తెలిసింది.