రోడ్డు పక్కన తినేవారిని ‘తాజ్‌’ హోటల్‌కు తీసుకెళ్లాడు!

ముంబయి: దేశ ఆర్థిక రాజధాని ముంబయిలో విలాసవంతమైన హోటల్ అది. అక్కడ టిఫిన్ చేయాలంటేనే భారీ మొత్తంలో చెల్లించుకోవాలి. మధ్యతరగతి వారు ఆ స్టార్ హోటల్‌కు వెళ్లేందుకు ఎంతో ఆలోచిస్తారు. కానీ ఓ యువకుడు మాత్రం తనతోపాటు ఐదుగురు యాచక చిన్నారులను విలాసవంతమైన తాజ్ హోటల్లోకి తీసుకెళ్లాడు. వారికి మంచి భోజనం పెట్టించాడు. ఆ చిన్నారులతో సంతోషంగా గడిపాడు. ఆ హోటల్ దగ్గర వారిని కొన్ని ఫొటోలు తీసి మురిసిపోయాడు.

ముంబయికి చెందిన యశ్‌ అనే ఓ యువ వ్యాపారవేత్త.. యాచిస్తున్న పిల్లల ముఖంలో ఆనందం కోసం పలు రకాల ప్రయత్నాలు చేస్తున్నాడు. గతంలో కొందరు పిల్లలను హెలికాప్టర్‌ ఎక్కించాడు. తాజాగా ముంబయిలోని ప్రసిద్ధ తాజ్‌ హోటల్‌లో ఐదుగురు యాచక పిల్లలకు భోజనం పెట్టించాడు. ఆ పిల్లలకు తానే స్వయంగా వడ్డించాడు. రహదారి పక్కన యాచించడం.. పెద్ద భవనాలను, హోటళ్లను బయటి నుంచి చూడటం తప్ప లోపలికి వెళ్లడం ఆ పిల్లల ఊహకు అందని విషయం. అలాంటిది ఆ యువకుడు తమను స్టార్‌ హోటల్‌కు తీసుకువెళ్లడంతో చిన్నారులు ఆశ్చర్యపోయారు. తాజ్‌ లోపల ఉన్న ఖరీదైన సౌకర్యాలు, సామగ్రిని చూసి ఆ పిల్లలు నివ్వెరపోయారు. రుచికరమైన భోజనం చేసి మురిసిపోయారు. ఈ ప్రత్యేకమైన ట్రీట్‌ ఇచ్చి పిల్లల ముఖాల్లో ఆనందం చూసి యశ్‌ సంబురపడ్డాడు. ఆ తర్వాత హోటల్‌ మొత్తం చూపించాడు. వారితో ఫొటోలు దిగాడు. యశ్‌ తన వ్యాపారంలో వచ్చిన ఆదాయం నుంచి పేద పిల్లల కోసం ఇలా ఖర్చు చేయడం అలవాటుగా మార్చుకున్నాడు.