Death Certificate: తన డెత్ సర్టిఫికెట్‌ పోయిందంటూ ప్రకటన..! వైరల్‌గా మారిన పోస్ట్‌!

ఇంటర్నెట్‌ డెస్క్‌: సామాజిక మాధ్యమాల్లొ ఎన్నో రకాల వీడియోలు, ఫొటోలు పోస్టు చేస్తూ ఉంటారు. వాటిల్లో ఆశ్చర్యానికి గురి చేసేవి కొన్ని ఉంటే, ఆలోచింపజేసేవి మరికొన్ని ఉంటాయి. ఇంకొన్ని నవ్వును పుట్టిస్తుంటాయి. ఓ వ్యక్తి ఇచ్చిన ప్రకటన ఎంతోమందిని నవ్వుకునేలా చేసింది. దీనికి సంబంధించిన వివరాలను ఐపీఎస్‌ అధికారి రుపిన్‌ శర్మ తన ట్విటర్‌ ఖాతాలో పోస్టు చేశారు. ‘దిస్‌ హేపెన్స్‌ వోన్లీ ఇన్‌ ఇండియా’ అంటూ క్యాప్షన్ జత చేశారు.

ఇంతకీ ఏమిటా పోస్టు.. ఓ వ్యక్తి తన డెత్ సర్టిఫికెట్‌ ( మరణ ధ్రువీకరణ పత్రం)  పోగొట్టుకున్నట్లు ఓ పత్రికలో ప్రకటన ఇచ్చాడు. 07-09-2022న అస్సాంలోని లందింగ్‌ బజార్‌ వద్ద ఘటన జరిగినట్లు పేర్కొన్నాడు. ఈ ప్రకటనలో రిజిస్ట్రేషన్‌ నంబరు, వరుస సంఖ్య కూడా ఉన్నాయి. ఈ పోస్టును వీక్షించిన వినియోగదారుల్లో ఒకరు ఆ వ్యక్తి తన సర్టిఫికెట్‌ స్వర్గం నుంచి ఇవ్వాలని అడుగుతున్నాడేమో అని నవ్వుతూ కామెంట్‌ చేశారు. మరో వినియోగదారుడు ఎవరో ఓ వ్యక్తి తన డెత్‌ సర్టిఫికెట్‌ పోగొట్టుకున్నాడు. దొరికినవాళ్లు అతనికి ఇచ్చేయండంటూ కామెంట్‌ చేశారు. ఇలా పలువురు వినియోగదారులు తమ అభిప్రాయాలను ట్విటర్‌ వేదికపై పంచుకున్నారు.