Andhra News: ‘భూములిచ్చింది అమరావతి అభివృద్ధికి.. అమ్ముకోవడానికి కాదు’

అమరావతి దళిత ఐకాస ధ్వజం

అమరావతి: రాజధాని భూములను ప్రభుత్వం తాకట్టు పెట్టడంపై అమరావతి రైతులు అభ్యంతరం వ్యక్తం చేస్తున్నారు. ఈ నేపథ్యంలో మందడంలోని సబ్‌ రిజిస్ట్రార్‌ కార్యాలయం వద్ద అమరావతి దళిత ఐకాస ఆందోళన చేపట్టింది. రాజధానిలోని 407 ఎకరాలను హడ్కోకు రాజధాని ప్రాంత అభివృద్ధి ప్రాధికార సంస్థ (సీఆర్‌డీఏ) శనివారం తనఖా పెట్టడంపై తీవ్ర అభ్యంతరం వ్యక్తం చేసింది.

‘‘రాజధాని కోసం మా పూర్వీకుల నుంచి వచ్చిన భూములను ప్రభుత్వానికి ఇచ్చాం. వైకాపా ప్రభుత్వం భూములను తనఖా పెట్టడాన్ని తీవ్రంగా వ్యతిరేకిస్తున్నాం. మేము భూములిచ్చింది ప్రాంతం అభివృద్ధి చేయడానికి కానీ అమ్ముకొని పార్టీని అభివృద్ధి చేసుకోవడానికి కాదు. తాకట్టుకు సంబంధించి రిజిస్ట్రేషన్‌ చేసిన వారిపై కేసు పెడుతున్నాం.
మందడంలోని 196ఎకరాల భూమిని తాకట్టు కోసం రిజిస్ట్రేషన్‌ చేశారు. దీన్ని రద్దు చేయాలని రిజిస్ట్రార్‌ను, ప్రభుత్వాన్ని కోరుతున్నాం. అమరావతి ప్రాంతం అభివృద్ధి కోసమే భూములను తాకట్టు పెడుతున్నట్లు ప్రమాణపత్రం ఇస్తే మేము సహకరిస్తాం. లేని పక్షంలో పెద్ద ఎత్తున నిరసన కార్యక్రమాలు చేపడతాం. రాజధాని ప్రాంతం అడవిలా, ఎడారిలా ఉందన్న మంత్రులు.. ఇప్పుడు ఏ విధంగా తనఖా పెడుతున్నారు’’ అని అమరావతి దళిత ఐకాస నాయకులు, రైతులు ప్రశ్నించారు.