Andhra news: అంతర్రాష్ట్ర బదిలీలకు సమ్మతి తెలపండి

తెలంగాణ ప్రభుత్వానికి ఏపీ ప్రభుత్వ ప్రధాన కార్యదర్శి లేఖ

అమరావతి: ప్రభుత్వ ఉద్యోగుల అంతర్రాష్ట్ర బదిలీలకు సమ్మతి తెలపాలని కోరుతూ ఏపీ ప్రభుత్వం.. తెలంగాణ ప్రభుత్వానికి లేఖ రాసింది. శాశ్వత ప్రాతిపదికన అంతర్రాష్ట్ర బదిలీలకు సమ్మతి తెలపాలని లేఖలో పేర్కొంది. ఈమేరకు తెలంగాణకు చెందిన 1,808 మంది, ఏపీకి చెందిన 1,369 మంది ఉద్యోగుల బదిలీలకు మార్గం సుగమం చేయాలని కోరింది. తెలంగాణ అభ్యర్థన మేరకు ఇప్పటికే బదిలీలకు తాము సమ్మతి తెలిపినట్లు ఏపీ ప్రభుత్వం లేఖలో పేర్కొంది. ఏపీకి వెళ్లే ఉద్యోగులకు శాశ్వత బదిలీ ప్రాతిపదికన ఎన్‌వోసీ ఇవ్వాలని ఏపీ ప్రభుత్వ ప్రధాన కార్యదర్శి సమీర్‌శర్మ లేఖలో కోరారు. అనేక కారణాలతో చాలా మంది ఉద్యోగులు అసంతృప్తితో ఉన్నారని, మానవతా దృక్పథంతో సమస్యను పరిష్కరించాలని పేర్కొన్నారు.