Andhra news: రుషికొండ తవ్వకాలపై ఎన్జీటీ స్టే.. సుప్రీంకోర్టును ఆశ్రయించిన ఏపీ ప్రభుత్వం

అమరావతి: విశాఖలోని రుషికొండ తవ్వకాలపై ఆంధ్రప్రదేశ్‌ ప్రభుత్వం సుప్రీంకోర్టును ఆశ్రయించింది. విశాఖ వద్ద రుషికొండ తవ్వకాలపై ఇటీవల జాతీయ హరిత ట్రైబ్యునల్‌ (ఎన్జీటీ) ప్రిన్సిపల్‌ ధర్మాసనం స్టే విధిస్తూ జారీ చేసిన ఆదేశాలను సుప్రీంకోర్టులో సవాల్‌ చేసింది. పర్యావరణ అనుమతులు అన్నీ పొందాకే తవ్వకాలు మొదలుపెట్టినట్లు పేర్కొంది. పర్యావరణానికి ఎలాంటి హాని తలపెట్టకుండా తవ్వకాలు చేపడతామని ఏపీ ప్రభుత్వం సుప్రీంకోర్టుకు తెలిపింది.వైకాపా ఎంపీ రఘురామకృష్ణరాజు దాఖలు చేసిన పిటిషన్‌పై ఈ నెల 6న తేదీన ఎన్జీటీ బెంచ్‌ విచారణ చేసింది. విచారణ చేపట్టిన ఎన్జీటీ.. తవ్వకాలపై అధ్యయనానికి సంయుక్త కమిటీని నియమించింది. నెల రోజుల్లో నివేదిక సమర్పించాలని కమిటీని ఆదేశించింది. తదుపరి ఉత్తర్వులు వెలువడే వరకు తవ్వకాలు నిలిపివేయాలని ప్రభుత్వాన్ని ఎన్జీటీ ఆదేశించింది. ఈ నేపథ్యంలో ఎన్జీటీ ఆదేశాలను సవాల్ చేస్తూ ఏపీ సర్కార్ సుప్రీంకోర్టును ఆశ్రయించింది.