Andhra News: ఏ ఒక్క ఉద్యోగీ సంతృప్తిగా లేరు: సూర్యనారాయణ

అమరావతి: రాష్ట్ర ప్రభుత్వం ఇచ్చిన 11వ వేతన సవరణపై ఏ ఒక్క ఉద్యోగి, ఉపాధ్యాయుడు సంతృప్తిగా లేరని ఆంధ్రప్రదేశ్‌ ప్రభుత్వ ఉద్యోగుల సంఘం రాష్ట్ర అధ్యక్షుడు కె.ఆర్‌.సూర్యనారాయణ అన్నారు. విజయవాడలో నిర్వహించిన మీడియా సమావేశంలో ఆయన మాట్లాడారు. పీఆర్సీపై సీఎం జగన్‌తో చర్చ సందర్భంగా విధిలేక తప్పనిసరి పరిస్థితుల్లోనే అంగీకరిస్తున్నట్లు చెప్పామన్నారు. పీఆర్సీపై ఒప్పందం మేరకు అంగీకరించిన వాటిపై ఈరోజుకీ ఉత్తర్వులు ఇవ్వలేదని ఆయన విమర్శించారు. ప్రభుత్వ చిత్తశుద్ధిలో లోపమా? అధికారుల అలసత్వమా?ఉత్తర్వులు రాకపోవడానికి కారణమేంటని సూర్యనారాయణ ప్రశ్నించారు.

సీపీఎస్‌ రద్దు, పాత పెన్షన్‌ విధానాన్ని తిరిగి అమలు చేస్తామని జగన్‌ హామీ ఇచ్చినా దానిపై ఎలాంటి నిర్ణయం తీసుకోలేదన్నారు. సమస్యల పరిష్కారానికి ప్రభుత్వం చిత్తశుద్ధి చూపించడం లేదని.. ఉద్యోగులు వాస్తవ పరిస్థితులను అర్థం చేసుకోవాలని కోరారు. ముఖ్యమంత్రి తన విశ్వసనీయత పోగొట్టుకోవద్దని ఆయన హితవు పలికారు. ఉద్యోగ ఉపాధ్యాయల సంఘాల మధ్య ఉన్న అనైక్యతను ప్రభుత్వం ఆసరాగా చేసుకుంటోందని సూర్యనారాయణ అన్నారు. మే 5న మళ్లీ సమావేశమైన భవిష్యత్‌ కార్యాచరణ ప్రకటిస్తామని ఆయన చెప్పారు.