AP High Court: నరేగా బిల్లుల చెల్లింపు వ్యవహారం.. 102 ఏపీ ప్రభుత్వ పిటిషన్ల కొట్టివేత

అమరావతి: మహాత్మాగాంధీ జాతీయ ఉపాధి హామీ పథకం (నరేగా) బిల్లుల చెల్లింపు వ్యవహారంలో ఆంధ్రప్రదేశ్‌ ప్రభుత్వం దాఖలు చేసిన రివ్యూ పిటిషన్లను హైకోర్టు కొట్టివేసింది. నరేగా పథకం కింద తమకు చెల్లించాల్సిన బిల్లులు పెండింగ్‌లో ఉన్నాయని గతంలో కాంట్రాక్టర్లు హైకోర్టులో పిటిషన్లు దాఖలు చేశారు. పిటిషన్లపై విచారణ చేపట్టిన ధర్మాసనం పెండింగ్ బిల్లులు చెల్లించాలని గతంలోనే తీర్పునిచ్చింది. ఉన్నత న్యాయస్థానం ఇచ్చిన తీర్పుపై రాష్ట్ర ప్రభుత్వం 102 రివ్యూ పిటిషన్లు దాఖలు చేసింది. కాంట్రాక్టర్లు పెద్ద మొత్తంలో బిల్లులు పెట్టారని.. దానికి సంబంధించిన ఆధారాలు తమవద్ద ఉన్నాయని ప్రభుత్వం తరఫు న్యాయవాది కోర్టు దృష్టికి తీసుకెళ్లారు. పిటిషన్లను రివ్యూ చేయాలని కోరారు. గతంలో పూర్తి స్థాయిలో పరిశీలించిన తర్వాతే ఎమ్ బుక్ ఎంట్రీ చేస్తారు కదా అని ప్రభుత్వ న్యాయవాదిని న్యాయస్థానం ప్రశ్నించింది. వాదనలు విన్న ధర్మాసనం 102 రివ్యూ పిటిషన్లను కొట్టివేస్తూ తీర్పు వెల్లడించింది.