AP High Court: అయ్యన్నపై తదుపరి చర్యలొద్దు: హైకోర్టు

అమరావతి: తెదేపా సీనియర్‌ నేత అయ్యన్నపాత్రుడికి హైకోర్టులో ఊరట లభించింది. పశ్చిమ గోదావరి జిల్లా నల్లజర్ల పోలీసులు తనపై నమోదు చేసిన కేసు కొట్టి వేయాలని అయ్యన్న క్వాష్‌ పిటిషన్‌ దాఖలు చేశారు. ఈ పిటిషన్‌పై ఉన్నత న్యాయస్థానం విచారణ జరిపింది. అయ్యన్నపై తదుపరి చర్యలు నిలిపి వేయాలని హైకోర్టు మధ్యంతర ఉత్తర్వులు ఇచ్చింది. 

అసలేం జరిగిందంటే..

అయ్యన్నపాత్రుడిపై నల్లజర్ల పోలీసులు సెక్షన్‌ 41(ఎ) నోటీసులు జారీ చేశారు. నల్లజర్లలో ఈ నెల 18న ఎన్టీఆర్‌ విగ్రహాష్కరణ సభలో సీఎంపై అనుచిత వ్యాఖ్యలు చేశారని స్థానిక వైకాపా నాయకుడు రామకృష్ణ ఫిర్యాదుతో కేసు నమోదు చేశారు. ఈ మేరకు నిన్న విశాఖ జిల్లా నర్సీపట్నం వచ్చిన పోలీసులు అయ్యన్నపాత్రుడు ఇంటికి నోటీసులు అంటించారు.

మరోవైపు నిన్నటి నుంచి పోలీసులు అయ్యన్న ఇంటే వద్దే ఉండటంతో ఆయనను అరెస్టు చేస్తారనే ప్రచారం జరుగుతోంది. ఈ నేపథ్యంలో నియోజకవర్గంలోని పలు ప్రాంతాల నుంచి తెదేపా నాయకులు, కార్యకర్తలు అయ్యన్న ఇంటికి తరలివచ్చిన విషయం తెలిసిందే.