Andhra News: ఆ వేతనం నాకొద్దు: ఆర్థికశాఖకు ఏపీఐఐసీ ఛైర్మన్‌ లేఖ

అమరావతి: ప్రభుత్వం చెల్లించే గౌరవ వేతనం తనకు వద్దంటూ ఆర్థికశాఖకు ఏపీఐఐసీ ఛైర్మన్‌ మెట్టు గోవిందరెడ్డి లేఖ రాశారు. ఏపీఐఐసీ ద్వారా తనకు వచ్చే వేతనాన్ని తిరిగి ఖజానాకు జమ చేస్తున్నట్లు ఆయన పేర్కొన్నారు. ప్రజలకు సేవ చేసేందుకు వచ్చిన తనకు గౌరవ వేతనం అవసరం లేదని లేఖలో గోవిందరెడ్డి స్పష్టం చేశారు.

రాష్ట్రంలోని అన్ని కార్పొరేషన్లు, సంస్థల ఛైర్మన్ల వేతనాలపై రాష్ట్ర ప్రభుత్వం ఇటీవల సీలింగ్‌ విధించింది. వేతనాలు రూ.65వేలు మించరాదని పేర్కొంది. ఇటీవల వరకు ఏపీఐఐసీ ఛైర్మన్‌కు ‘ఆర్‌’ కేటగిరి హోదాను ప్రభుత్వం కల్పించింది. వేతనంతో కలిపి ఇతర సౌకర్యాలకు గాను రూ.3.82 లక్షలు వరకు చెల్లించేవారు. అయితే ప్రభుత్వం కార్పొరేషన్‌ ఛైర్మన్‌ గౌరవ వేతనాలపై సీలింగ్‌ విధించడంతో ఒక్కసారిగా ఏపీఐఐసీ ఛైర్మన్‌ వేతనం రూ.65వేలకు తగ్గింది.