Italy: కంటికి కనిపించని కళాఖండాన్ని అమ్మేశారు..!

రోమ్‌: కళా ప్రపంచానికి హద్దులు ఉండవని మరోసారి నిరూపితమైంది. ఇప్పుడు ఇటలీకి చెందిన సాల్వటోర్‌ గారో విషయంలో అదే నిజమైంది. ఆయన ‘లో సోనో’(నేను) అనే పేరుతో రూపొందించానని చెబుతోన్న ఓ కళాఖండాన్ని 18,000 డాలర్లకు విక్రయించారు. ధర పరంగా చూసుకుంటే ఇది చెప్పుకునే విషయమేమీ కాకపోయినా.. ఆయన అమ్మింది ఓ అదృశ్య శిల్పాన్ని(Invisible Sculpture). ఈ విషయమే ఇప్పుడు ప్రపంచాన్ని ముక్కున వేలేసుకునేలా చేస్తోంది. ఈ మేరకు స్థానిక మీడియా వివరాలు వెల్లడించింది. 

కొద్ది రోజుల క్రితం సాల్వటోర్‌.. ‘లో సోనో’ను ఇటాలియన్ ఆక్షన్ హౌస్ ‘ఆర్ట్‌ రైట్‌’లో అమ్మకానికి ఉంచారు. ఆ అదృశ్య శిల్పం 6 నుంచి 8 వేల డాలర్లు పలుకుతుందని అక్కడి సిబ్బంది అంచనా వేశారు. కానీ అది మాత్రం 18,300 డాలర్లకు అమ్ముడైంది. ఈ సందర్భంగా దాని రూపకర్త సాల్వటోర్‌ మీడియాతో మాట్లాడారు. ‘నేను ఒక కళాఖండాన్ని ఖాళీ ప్రదేశంగా భావిస్తాను. ఆ ఖాళీ ప్రదేశం పూర్తిగా శక్తితో నిండి ఉంటుంది. ఒకవేళ మనం దాన్ని ఖాళీ చేస్తే అక్కడేమీ ఉండదు(నథింగ్). కానీ హైసన్‌బర్గ్ అన్‌సెర్టెయినిటీ నియమం ప్రకారం.. ఆ ఏమీలేని దగ్గర కూడా బరువు ఉంటుంది. మనం చూడలేని శక్తి అక్కడ ఉంటుంది. అది గాలి, ఆత్మతో తయారై ఉంటుంది. గాలి, ఆత్మతో కూడిన ఈ శిల్పాన్ని కృత్రిమ వెలుతురు, వాతావరణ నియంత్రణ లేని ప్రదేశంలో ఏర్పాటు చేయాలి’ అని చెప్పుకొచ్చారు. అలాగే తన కళను సమర్థించుకుంటూ.. ‘మనం ఎన్నడూ చూడని దేవుని ఆకృతిని తయారు చేయలేదా?’ అంటూ ఎదురు ప్రశ్నించారు. ఈ అదృశ్య శిల్పంలాంటి అంశాలు ఆయనకు కొత్తేం కాదు. ఫిబ్రవరిలో ఈ తరహాలోనే తన కళను ప్రదర్శించారు. 

నాన్‌ ఫంగిబుల్ టోకెన్స్(ఎన్‌ఎఫ్‌టీ)కు ప్రజాదరణ లభిస్తోన్న తరుణంలో అదృశ్య కళలు వెలుగులోకి వస్తున్నాయి. ఎన్‌ఎఫ్‌టీలను డిజిటల్‌ ఆస్తులుగా చెప్పుకోవచ్చు. బ్లాక్‌ చెయిన్ టెక్నాలజీ ద్వారా వర్తకం చేసే వీలున్న ఈ డిజిటల్ ఆస్తులు నేడు అందరి దృష్టిని ఆకర్షిస్తున్నాయి. ట్విటర్ సీఈఓ జాక్‌డోర్సే చేసిన తొలి ట్వీట్ రూ.21 కోట్లకు వేలంలో అమ్ముడుపోయినప్పుడు ఈ కాన్సెప్ట్ ప్రచారంలోకి వచ్చింది. వీటి ద్వారా ట్వీట్లు, చిత్రాలు, వీడియోలు.. ఇలా వేలానికి ఉంచిన వేటినైనా కొనుగోలు చేయొచ్చు. ఈ ప్రక్రియ అంతా జరిగేది డిజిటల్ ప్రపంచంలో మాత్రమే.