Health: అజీర్తి బాధలకు ఇలా చేస్తే విరుగుడు

ఇంటర్నెట్‌ డెస్క్‌: పొట్టలో ఏ చిన్న సమస్య వచ్చినా సంకటం మొదలవుతుంది. అజీర్తి బాధ చెప్పలేనంత ఇబ్బంది పెడుతుంది. తిన్నది అరగదు.. పొట్టంతా ఉబ్బరంగా ఉంటుంది. పొట్టంతా రాయిలా మారుతుంది. ఎటు కదలలేం.. ఏ పనీ చేయలేకపోతాం. పొట్టలో అజీర్తి బాధలకు ఆయుర్వేదంలో ఆయుర్వేద ఫిజిషియన్‌ గాయత్రీదేవి పలు నివారణ మార్గాలను సూచించారు. 

* జీర్ణమండలం శరీరమనే యంత్రానికి ఇంధనాన్ని సరఫరా చేసే అతి ముఖ్యమైన వ్యవస్థ. ఇందులో ఏ చిన్న సమస్య వచ్చినా శరీరమంతా ప్రభావం చూపిస్తుంది.

* ఆహారం అధికంగా తీసుకోవడంతోనే అజీర్తి వస్తుందని ఆయుర్వేదం చెబుతోంది.

* ఛాతీ, గుండెలో మంటగా అనిపిస్తుంది. అజీర్తితో పాటు బరువు తగ్గిపోతున్నపుడు, తరచు వాంతులు అవుతున్నపుడు మలం రంగులో మార్పులు కనిపిస్తున్నపుడు శరీరంలో ఏదో జబ్బు ఉన్నట్టు అనుమానించాలి.

* ఆకలి, జీర్ణశక్తి సరిగా ఉంటే ఎలాంటి అనారోగ్యం ఉండదు. ఎవరికైనా ఆకలి, జీర్ణశక్తి సరిగా లేకపోతే మొదట పుల్లపుల్లగా, కారంగా ఉండే ఆహారం తీసుకోవాలి. ఇవి ఆకలి, జీర్ణశక్తిని పెంచుతాయి. తీపి పదార్థాలు తింటే ఆకలి తగ్గిపోతుంది.

* పచ్చి అరటికాయను ఎండబెట్టి పొడి చేసి ఒక గ్రాము ఉప్పుతో కలిపి సేవించాలి.

* బెల్లంతో శొంఠిపొడి కలిపి భోజనానికి ముందు తీసుకుంటే అజీర్తి బాధలు తగ్గుతాయి.

* పొట్ట ఉబ్బరంగా ఉన్నపుడు ఉప్పు కలిపిన నీళ్లను తాగితే మంచి ఫలితం ఉంటుంది.

* అల్లం, జీలకర్ర, సైంధవ లవణం నిమ్మరసంలో ఊరవేసి ప్రతిరోజు ఉదయం పూట తీసుకుంటే పొట్టలో అజీర్తి బాధ ఉండదు. 

* మర్రి చెక్కను పొడిగా చేసిగానీ కషాయం పెట్టి గానీ తీసుకుంటే బాగుంటుంది.

* కరివేపాకు, పుదీనా, కొత్తిమీర జీర్ణశక్తిని మెరుగు పరుస్తాయి.

* వ్యాయామం చేస్తే ఎంతో ఫలితం ఉంటుంది. ఆహారం తీసుకున్న వెంటనే పడుకుంటే భోజనం జీర్ణం కాదు.

* నిమ్మరసం, అల్లం, ఉప్పు కలిపి భోజనం చేసే ముందు తీసుకుంటే ఆహారం బాగా జీర్ణం అవుతుంది.

* వాముని వేడి చేసి పొడిగా మార్చుకొని అన్నం తినడానికి ముందు ఒక  ముద్ద నెయ్యితో అన్నంలో కలుపుకొని తినాలి.