Bill Gates: మైక్రోసాఫ్ట్‌ 47 ఏళ్ల వేడుక.. బిల్‌గేట్స్‌ అదిరిపోయే స్టంట్‌

ఇంటర్నెట్‌ డెస్క్‌: ప్రపంచంలోనే అత్యంత సంపన్నమైన సంస్థల్లో ఒకటైన మైక్రోసాఫ్ట్‌ను స్థాపించి సోమవారం నాటికి 47 ఏళ్లు. బిల్‌గేట్స్‌తో పాటు, ఆయన చిన్ననాటి స్నేహితుడు పాల్‌ ఆల్లెన్‌ 1975 ఏప్రిల్‌ 4న స్థాపించారు. కాగా ఈ ప్రత్యేకమైన రోజును పురస్కరించుకొని, గత స్మృతులను గుర్తుచేసుకుంటూ మాజీ సీఈఓ బిల్‌గేట్స్‌ ఓ పాత వీడియోను పంచుకున్నారు. మైక్రోసాఫ్ట్‌ ఆఫీస్‌లోనే ఏళ్ల క్రితం ఓ కుర్చీపైనుంచి అవతలివైపు దూకుతున్న వీడియోను ఇన్‌స్టాగ్రామ్‌లో పంచుకున్నారు. ‘ప్రతి ఇంటిలో, ప్రతి డెస్క్‌పై కంప్యూటర్‌ ఉంచేందుకు చేసిన ప్రయత్నంలో మైక్రోసాఫ్ట్ ఎన్నో ఎత్తుపల్లాలను చవిచూసింది. ఈ భూమి మీద ఉన్న ప్రతి వ్యక్తి, సంస్థ మరింత పురోగతి సాధించేందుకు సంస్థ కృషి చేస్తున్నందుకు గర్వపడుతున్నా’ అంటూ రాసుకొచ్చారు.

బిల్&మెలిండా గేట్స్ ఫౌండేషన్ దాతృత్వ పనులపై దృష్టి పెట్టాలనుకున్న గేట్స్‌ 2000 సంవత్సరంలోనే మైక్రోసాఫ్ట్‌ సీఈవో పదవి నుంచి వైదొలిగారు. 2008 నుంచే సంస్థలో పూర్తిస్థాయి కార్యకలాపాలకు దూరంగా ఉన్న ఆయన.. 2020 మార్చి వరకు బోర్డు సభ్యుడిగా కొనసాగాడు.