Covid Vaccine: వాళ్లకి ఇంటి వద్దే బూస్టర్‌ డోసు: జీహెచ్‌ఎంసీ

హైదరాబాద్‌: 60 ఏళ్లు పైబడి, దీర్ఘకాలిక వ్యాధులతో బాధపడుతున్న వారికి ఇంటి వద్దకే కరోనా వ్యాక్సిన్ సేవలు అందించాలని జీహెచ్‌ఎంసీ నిర్ణయించింది. ఇప్పటి వరకూ ప్రాథమిక ఆరోగ్య కేంద్రం, వ్యాక్సినేషన్ సెంటర్‌కు వెళ్లి వ్యాక్సిన్‌ తీసుకోనివారు.. జీహెచ్ఎంసీ హెల్ప్ లైన్‌కు ఫోన్ చేస్తే ఇంటికి వెళ్లి బూస్టర్ డోస్ వేస్తామని జీహెచ్ఎంసీ వెల్లడించింది. కరోనా విజృంభిస్తోన్న నేపథ్యంలో పురపాలక శాఖ మంత్రి కేటీఆర్, వైద్య ఆరోగ్య శాఖ మంత్రి హరీశ్‌ రావు ఆదేశాలతో అధికారులు చర్యలు తీసుకుంటున్నారు.

ఒకటి కంటే ఎక్కువ దీర్ఘకాలిక వ్యాధులు ఉన్నవారు, పలు కారణాలతో బూస్టర్ డోస్ వేసుకోని వారు జీహెచ్ఎంసీ ఏర్పాటు చేసిన హెల్ప్ లైన్ 040 21111111 నంబర్‌కు ఫోన్ చేయాలని జీహెచ్‌ఎంసీ సూచించింది. మొబైల్ వాహనం ద్వారా ఇంటికి వచ్చి వాక్సిన్‌ వేస్తారని.. ఈ అవకాశాన్ని సద్వినియోగం చేసుకోవాలని అధికారులు వెల్లడించారు.