Yadadri: యాదాద్రిలో వార్షిక బ్రహ్మోత్సవాలు ప్రారంభం

యాదగిరిగుట్ట: యాదాద్రి మహాదివ్య క్షేత్రంలో వార్షిక బ్రహ్మోత్సవాలు మొదలయ్యాయి. పాంచారాత్రాగమ విధానాలతో శ్రీలక్ష్మీనరసింహస్వామి బ్రహ్మోత్సవాలను ప్రారంభించారు. 11 రోజులపాటు కొనసాగే ఈ ఉత్సవాలను విష్వక్సేన ఆరాధనతో శ్రీకారం చుట్టారు. ఈ సందర్భంగా విష్వక్సేన ఆరాధన, ఆలయ శుద్ధి పర్వాలను నిర్వహించారు.

పునర్‌ నిర్మితమైన ప్రధానాలయంలో బ్రహ్మోత్సవాలు జరగడం ఇదే తొలిసారి. ఈ నెల 23 నుంచి అలంకారోత్సవాలు, 27న రాత్రి విశేష వేడుకలు ప్రారంభం కానున్నాయి. 28న రాత్రి తిరుకల్యాణ మహోత్సవం, మార్చి 1న రాత్రి దివ్య విమాన రథోత్సవం అనంతరం మార్చి 3న ఉత్సవాలు ముగియనున్నాయి. 28న రాత్రివేళ నిర్వహించే శ్రీలక్ష్మీనరసింహస్వామి తిరుకల్యాణ మహోత్సవంలో సీఎం కేసీఆర్‌ దంపతులు పాల్గొని రాష్ట్ర ప్రభుత్వం తరఫున పట్టువస్త్రాలు, ముత్యాల తలంబ్రాలు అందజేసే అవకాశముందని అధికారులు తెలిపారు.