Harish rao: మూడు మెడికల్‌ కళాశాలలున్న నగరం.. వరంగల్‌: హరీశ్‌రావు

వరంగల్: తెలంగాణలో 60 ఏళ్లలో 3 ప్రభుత్వ కళాశాలలు ఉంటే.. కేవలం 9 ఏళ్లలోనే ఆస్పత్రుల సంఖ్య 21కి చేరిందని రాష్ట్ర మంత్రి హరీశ్‌రావు అన్నారు. వరంగల్‌ పట్టణంలో మంత్రులు హరీశ్‌రావు, ఎర్రబెల్లి దయాకర్‌ రావు పర్యటించారు. హంటర్‌రోడ్డులోని ప్రైవేటు వైద్య కళాశాలను మంత్రులు ప్రారంభించారు. హనుమకొండలోని ప్రభుత్వ ప్రసూతి ఆస్పత్రిలో రేడియాలజీ ల్యాబ్‌నూ వారు ప్రారంభించారు. నాడు ప్రభుత్వ, ప్రైవేటులో కలిపి 20 వైద్య కళాశాలలు ఉండేవని.. నేడు అవి 55కు చేరాయన్నారు. ఎంబీబీఎస్‌ సీట్లు 2,950 నుంచి 8,340కి పెరిగాయన్నారు. ఇప్పుడు 3 మెడికల్‌ కళాశాలలున్న నగరంగా వరంగల్‌ అవతరించిందని పేర్కొన్నారు. రూ.1100 కోట్లతో హెల్త్‌ సిటీ నిర్మాణం జరుగుతోందని హరీశ్‌రావు వెల్లడించారు.