కరోనా బాధితుల్లో 3నెలల వరకు యాంటీబాడీలు

ఇంటర్నెట్‌ డెస్క్‌: కరోనా రోగుల్లో కనీసం 3నెలల వరకు యాంటీబాడీలు ఉంటాయని శాస్త్రవేత్తలు గుర్తించారు. అమెరికాలోని హార్వర్డ్‌ మెడికల్‌ స్కూల్‌కు చెందిన శాస్త్రవేత్తలు సహా పలువురు పరిశోధకులు ఈ మేరకు జర్నల్‌ సైన్స్‌లో కథనాన్ని ప్రచురించారు. 343 మంది కరోనా రోగుల్లోని రక్తంలో ఉన్న యాంటీబాడీల కదలికలపై దృష్టి పెట్టగా, వైరస్‌ లక్షణాలు తేలిన తరువాత 122 రోజుల పాటు పరిశీలించి పరిశోధకులు ఈ ఫలితాలను వెల్లడించారు. వైరస్‌ను గుర్తించడంలో ప్రత్యామ్నాయ పరీక్ష విధానానికి తాజా పరిశోధన దోహదం చేయనుంది. యాంటీబాడీ పరీక్ష కోసం లాలాజలాన్ని ప్రత్యామ్నాయ బయో ఫ్లూయిడ్‌గా వినియోగించవచ్చని ఈ కథనంలో తెలిపారు. యాంటీబాడీలను ఐజీజీ, ఐజీఏ, ఐజీఎంలుగా వర్గీకరించిన పరిశోధకులు వీటిలో ఐజీజీ రకం యాంటీబాడీ రక్తం.. లాలాజలంలో ఎక్కువ కాలం ఉంటుందని గుర్తించారు.